«Халық не жеп отырғанын білмейді»: депутат Ақтауда ветеринариялық зертхананың тезірек ашылуын талап етті

Өңірлердегі зертханалардың көбі әбден ескірген және тозған

Фото ашық дереккөзден

Өңірлердегі ветеринариялық зертханалардың әбден тозығы жеткен. Ал Ақтау қаласында жабылып қалған республикалық зертхананың қашан салынатыны әлі күнге дейін белгісіз. Мәжіліс депутаты Еділ Жаңбыршин Ауыл шаруашылығы министрінің аталған мәселені бүгінге дейін шешпей отырғанына шүйлікті, деп хабарлайды Azattyq Rýhy.

Депутаттың айтуынша, еліміздің батысындағы республикалық ветеринариялық зертхананың жабылып қалуы халық тұтынатын азық-түліктің қауіптілігін арттыруы мүмкін.

«Өңірлердегі зертханалардың көбі әбден ескірген және тозған. Сіз өзіңіздің баяндамаңызда бұл туралы бір ауыз айтқан жоқсыз. Бұдан басқа Маңғыстау облысының орталығы Ақтау қаласында 2-3 жылдан бері ветеринариялық зерхана жұмыс істемейді. Себебі ғимарат апаттық жағдайға ұшырауына байланысты жабылып қалған. Серологиялық зерттеулер басқа ауданда жүргізіледі, ал тамақ өнімдерінің вирусологиялық зерттеулердің сынамалары Ақтөбе мен Орал қалаларына жолданады. Қазір геосаяси жаңдайға байланысты бізге тамақ өнімдерінің Құрық порты арқылы келуі артады. Онда ет және балық өнімдері бар. Олардың бәрін тексеру керек. Қазіргі жағдайда сол тауармен айналысатын кәсіпкерлер наразылығы бар. Одан басқа осы жағдайды білген тауар тасымалдаушылар елге сапасыз заттарды әкелуі мүмкін. Жалпы Маңғыстауға сыртан келетін тауар өнімдерінің сапасына үлкен күмән бар. Біз халық не жеп отырғанын білмейміз. Осыған орай Ақтаудағы зертхана қашан ашылады? Біз осылай не жегенімізді білмей отыра береміз бе!?» - деді Мәжіліс депутаты Еділ Жаңбыршин министрге қойған сауалында.

Өз кезегінде министр бұл мәселеден хабардар екенін жеткізді. Былтырғы Маңғыстау облысына жасаған сапарында да жергілікті тұрғындар осы мәселені көтерген екен. Алайда Қарашөкеевтің айтуынша, ол кезде республикалық ветеринариялық зертхананы қайта құруға қаражат болмаған.

«Жобалық сметалық құжат дайын болғаннан кейін ақшаны қарастырып зертхананы салуды бастаймыз. Зертхананы салу ол біздің міндетіміз, оны өзіміздің бақылауымызда ұстап отрымыз», - деді министр.

Еділ Жаңбыршин зертхана болмайынша министрдің бүгінгі ұсынған реформалық өзгерісі түкке де жарамайтынын алға тартты. Осыған орай халық қалаулысы министрден зертхананың нақты қашан ашылатынын қайталап сұрады.

Алайда Ауыл шаруашылығы министрі нақты мерзімді өзі айта алмағандықтан бұл сұраққа Ветеринариялық бақылау және қадағалау комитетінің төрағасы Асқар Жақыпбаев жауап берді.