Алматы полициясы пәтер ұрыларын ұстады

Алматы полициясы пәтер ұрыларын ұстады, деп хабарлайды Azattyq Rýhy  Polisia.kz сайтына сілтеме жасап.

Бұл топтың жетекшісі 45 жастағы әйел адам. Оның “көмекшілері” бұрын сотталған екі ер адам. Олар пәтер тонаумен айналысқан.

«Қазіргі уақытта қылмыстық үштікте қала аумағында жасалған бес ұрлық эпизоды бар. Күдіктілерді әшкерелеуге арналған арнайы іс-шара өткен күні жүргізілді. Кезекті ұрлық жасағаннан кейін олар бірден ұсталды. Ұрылар мінген Nexia көлігі жеке секторда бұғатталды. Ұсталғандардан заттай айғақтар: гитара, нарда, бірнеше телефон және бағалы заттар табылды. Сонымен қатар, жасанды шаш, әмиян және кілттер анықталды», – деді Алматы қалалық Полиция департаменті бастығының орынбасары Берік Әбілбеков.

Спикердің айтуынша, “криминалдық үштіктің” соңғы қылмысы Өжет шағын ауданында жасалған. Олар бөтен үйге терезеден кірген.

«Олар стандартты түрде әрекет етті, тұрғын үйге кірер алдында үй иелерінің бар-жоғын тексерді, содан кейін ғана құлыпты ашты. Олар барлық құнды заттарды: ақшаны, шағын құрал-жабдықтарды, түрлі зергерлік бұйымдарды алып шықты. Екеуі біреудің үйінде ұрлық жасап жатқанда, үшіншісі көлікте күткен, былайша айтқанда қауіпсіздікті бақылап тұрған. Айтпақшы, күдіктілер 45 жастағы Х. есімді азаматша және 44 жастағы К. есімді азамат, бұрын осыған ұқсас қылмыстарды жасағаны үшін сотты болған, ал үшінші қатысушы 35 жастағы  азамат, бірінші рет “қылмыстық жолға” түскен. Қазіргі уақытта пәтер ұрлығына қатысушылар уақытша ұстау изоляторына қамалды. Сотқа дейінгі тергеу амалдары жүргізіліп, олардың басқа да қылмыстық эпизодтарға қатысы бар-жоғы анықталуда», – деді Б. Әбілбеков.