Қызылжарда қалалық әкімдіктен көпір жөндеу үшін бөлінген 21 млн теңге желге ұшты
Жолдың қашан қалпына келтірілетіні әзірге белгісіз
Қызылжарда қалалық әкімдіктен көпір жөндеу үшін бөлінген 21 миллион теңге желге ұшты. Бұған дейін де талай жыр болған Жұмысшы кентіндегі өткел мәселесі тағы қызу талқыға түсуде, деп хабарлайды Azattyq Rýhy Астана арнасына сілтеме жасап.
Көпір 2014 жылы күрделі жөндеуден өткен. Ал бірнеше жылдан кейін үстіндегі бетон тіреуіштер сөгіліп, плиталары ажырай бастаған. Кепілдікке берілген мерзім өтіп кеткендіктен, билік өкілдері бұрынғы мердігерлерді жауапқа тарта алмапты. Сондықтан былтыр шұрық-тесікті жамау үшін бюджеттен тағы 21 миллион теңге бөлінген. Бірақ жаңа мердігерлер шұңқырларды картон қағазбен жауып, жұрттың сынына іліккен болатын. Енді араға жарты жыл салып, өткел тағы сыр берді.
Жолдың қашан қалпына келтірілетіні әзірге белгісіз. Билік өкілдері де оны білмейді.
«Жұмысшы кентінде көпірдің деформациялық қосындыларының бұзылуын тоқтату үшін цемент ерітіндісімен жамау шешімі қабылданды. Осыған дейін асфальт-бетон ерітіндісі қолданылған еді. Бүгінде ерітіндіні ұстайтын темір тор босап қалған. Қолайлы ауа райы кезінде кепілдендірілген міндеттемелер аясында мердігерлік компания жұмысты қалпына келтіретінін хабарлаймыз», - деді Петропавл қаласының Тұрғын үй коммуналдық шаруашылығы бөлімі.
