Атырауда халықаралық іздеуде жүрген үш қылмыскер ұсталды
Оның бірі – Өзбекстан Республикасының азаматы
Атырауда халықаралық іздеуде жүрген үш қылмыскер ұсталды. Оның бірі – шетелдік. Бұл туралы Атырау облыстық полиция департаментінің баспасөз қызметі мәлім етті, деп хабарлайды Azattyq Rýhy.
Департамент ұсынған мәліметке сүйенсек, Атырауда «Іздестіру» операциясы өтіп жатыр. Аталған шара 18 наурызға дейін жалғасады.
«Полиция қызметкерлері екі күнде хабар-ошарсыз кеткен 2 адамды тауып, сот үкімімен халықаралық іздеу жарияланған 3 қылмыскерді қолға түсірді. Халықаралық іздеуде болғанның біреуі – Өзбекстан Республикасының 33 жастағы азаматы. Оған қатысты 2019 жылы Ресей Федерациясы ІІМ РФ Қылмыстық Кодексінің 160-бабының 4-бөлігімен қылмыстық іс қозғаған», - деп хабарлады департаменттің баспасөз қызметі.
Атырау облыстық полиция департаменті криминалды полиция басқармасының қызметкерлері ұстаған шетелдік уақытша ұстау изоляторына қамауға алынды.
