Ауа райының нашарлауына байланысты республикалық маңызы бар жолдардың бірнешеуі жабылды
БҚО ТЖ департаменті тұрғындарға осы бағытта алыс жолға шықпау керектігін ескертеді
Батыс Қазақстан облысында ауа райының нашарлауына байланысты республикалық маңызы бар жол жабылды.
«ҚазАвтоЖол» ҰК» АҚ БҚО филиалының мәліметі бойынша, Казталов-Жәнібек (0- 158 км , Казталов-Жәнібек-РФ шекарасы) жолында барлық көлік түрлері үшін қозғалысқа шектеу қойылды. Жабылу себебі – қатты боран.
БҚО ТЖ департаменті тұрғындарға осы бағытта алыс жолға шықпау керектігін ескертеді.
«Бұрқасын мен көктайғақ көлік құралын басқаруды қиындатып, соның салдарынан жолдарда апат болу ықтималдылығы артады. Сондықтан БҚО ТЖ департаменті жүргізушілер мен жолаушыларға жол ережесін бұзбай, жылдамдықты арттырмай, қашықтықты сақтау, мүмкіндігінше ұзақ сапарға шықпай, үйде болу керектігін еске салады», - деп хабарлады ведомстводан.
Сонымен қатар республикалық маңызы бар Өнеге-Бисен-Сайқын, облыстық Тасқала-Аққурай-РФ шекарасы және Үлкен Шаған-Переметный жолдары жабық.
