Бекшин зейнетке былтыр шыққан – ДСМ

Бүгін әлеуметтік желіде Алматының бас санитар дәрігері Жандарбек Бекшин зейнетке кететіні туралы ақпарат тарады. Денсаулық сақтау министрлігінің баспасөз қызметі Azattyq Rýhy басылымына хабарлағандай, Бешкин зейнет жасына былтыр толған.

«Ол кісі (Жандарбек Бекшин - ред) зейнет жасына былтыр толған. Бірақ, мемқызметкер мемлекеттік қызмет туралы заң аясында бір жыл келісімшартпен жұмыс істей алады. Міне, келісімшартының уақыты аяқталатындықтан Бекшин 5 қаңтардан зейнетке кетеді», - деп хабарлады ДСМ-ның баспасөз қызметі.

Кейбір дереккөз 5 қаңтар күні Алматының жаңа бас санитар дәрігері тағайындалатынын хабарлап жатыр.

Алматы қалалық санитарлық-эпидемиологиялық бақылау департаментінің баспасөз қызметі хабарлағандай, Жандарбек Бекшин 27 желтоқсаннан бастап 4 қаңтарға дейін демалыс алған, оның міндетін Қарлығаш Әбдіжаппарова уақытша атқарып отыр.

Естеріңізге сала кетейік, Жандарбек Бекшин 2017-2019 жылдар аралығында Қазақстанның бас санитар дәрігері болған. Кейін Алматыға жұмыс ауыстырған еді.