Елімізде кинотеатр билетінің бағасы 13 пайызға қымбаттады

Елімізде кинотеатр билетінің бағасы өткен жылмен салыстырғанда 13 пайызға қымбаттап, қыркүйек айында 1600 теңгеге жетті, деп хабарлайды Еnergyprom.kz  сайты.

Қазақстан қалалары арасында ең қымбат кино билеттері Шымкент шаһарында тіркеліп отыр. Мұнда кинотеатрға кіру құны – 2600 теңге. Ал ең арзан баға Семей қаласында – 1100 теңге.

Ақтөбе, Қызылорда, Атырау өңірлерінде де кинотеатр билетінің бағасы өскен. Ал Ақмола, Алматы, Маңғыстау, Түркістан облыстарында баға былтырғы деңгейде сақталып тұр.

Айта кетейік, үстіміздегі жылдың бірінші жартыжылдығында кино, бейнефильмдер және телевизиялық бағдарламалар өндірісі бойынша қызметтер көлемі 21,2 млрд теңгеге жеткен. Бұл өткен жылмен салыстырғанда 19,6% көп.