Елімізде азық-түлік өндірісіне 754 млрд теңге қаражат жұмсалады

АШМ жеті бағытты анықтады

Фото: ашық дереккөзден

Қазақстандық азық-түлік өндірісіне 754 млрд теңгеге жуық инвестиция тарту жоспарланып отыр, деп хабарлайды LS.

Ақпаратқа сәйкес, инвесторлар 753,7 млрд теңге сала алатын жеті бағыт анықталды. Астық, қант, жеміс-жидек өндіру және қайта өңдеу, сондай-ақ, майлы дақылдар бойынша экожүйелер құру жоспарлануда.

Ауыл шаруашылығы министрлігінің болжамы бойынша, ет кәсіпорындарын іске қосуға инвестициялар көлемі 293,2 млрд теңгені құрауы мүмкін. Қуаты болжам бойынша жылына 186 мың тонна етті құрап, 7,9 мың жұмыс орны ашылмақ.

184,8 млрд теңге инвестиция салынатын екінші бағыт – сүт өндіру және қайта өңдеу. Жаңа жобаларды іске асыру есебінен елімізде 640 мың тонна өнім шығарылады. 602 адам жұмыспен қамтылады.

Өңірлерде жалпы құны 12,6 млрд теңге болатын астық өндіретін және терең өңдейтін кәсіпорындар жұмыс істейді деп күтілуде. Нысандардың қуаттылығы 580 мың тонна астықты құрайды. 15 мыңнан астам адам жұмыс орындарымен қамтамасыз етіледі. Сондай-ақ, 150 мың тонна қант шығарылады. Бұл жобаны іске асыру 99 млрд теңгеге бағаланып отыр. Зауытта 300-ден астам адам жұмыс істейтін болады.

Қазақстанда дамытатын бесінші бағыт – жеміс өндіру және қайта өңдеу. Мұнда 15 мыңнан астам жұмыс орны құрылады.

«Инвестициялардың болжамды көлемі 3,5 млрд теңге, болжамды қуаты - жылына 14 мың тонна жеміс-жидек», - деп толықтырды министрлік.

Ал жемістер мен көкөністерді шығаратын және өңдейтін кешендер мен зауыттар ашу үшін 64,5 млрд теңге тарту жоспарда бар. АШМ-да бәс тігетін жетінші бағыт – майлы дақылдар. Құны – 96,1 млрд теңге. Сонымен қатар, министрлік экожүйелерді қалыптастыру үшін инвестициялар тарту бойынша жұмыс жалғасуда деп мәлімдеді.

Алайда, министрлік экожүйелер шеңберінде өндірістер құру кезінде белгілі бір тәуекелдер туындауы мүмкін екенін жоққа шығармайды. Мысалы, инвестор тарапынан бас тарту, айналым қаражатының жетіспеушілігі, елдегі және әлемдік нарықтардағы тұрақсыз экономикалық немесе эпидемиологиялық ахуал және тағы басқалар.

Бұған дейін хабарланғанымыздай, экожүйелер өңірлерді мамандандыру және қолданыстағы іске асырылып жатқан жобалар негізінде ресурстардың қолжетімділігіне сай құрылатын болады.

×
Бұл желілік ресурстың ақпараттық өнімдері 18 жастан асқан адамдарға арналған.