Оқушылардың қауіпсіздігі үшін ата-аналар да екпе салуы тиіс – Сағынтаев

Мұғалімдер, қызметкерлер және ата-аналар мектеп тек Ashyq жүйесімен ғана кіре алады

Фото: 24.kz

Алматы қаласының әкімі Бақытжан Сағынтаев мектеп оқушыларын қорғау үшін қала тұрғындарын екпе алуға шақырады, деп хабарлайды Azattyq Rýhy.

«Офлайн форматта басталуы тиіс жаңа оқу жылы қарсаңында оқушылар мен студенттер арасында жұқтырудың алдын алу үшін екпе алу өте маңызды», - деп шаһар басшысы алматылықтарға үндеу жасады.

Akimat Live бағдарламасының тікелей эфирінде қала әкімі қаладағы эпидемиологиялық ахуал туралы айтты. 11 тамыздағы жағдай бойынша 115 060 коронавирус инфекциясы тіркелді, оның ішінде 95 087 науқас симптомды, 19 973 жағдай — симптомсыз, 2104-і анықталмаған пневмония жағдайы. 10 тамызда коронавирус инфекциясының 1493 жағдайы тіркелді, оның ішінде 1397 жағдай симптомды. Анықталмаған пневмония — 7 жағдай. Тәуліктік өсім — 1,2%. Репродуктивті саны — 1,010.

«Жалпы қуаттылығы 8910 төсек-орын болатын инфекциялық стационарларда 5474 адам, оның ішінде 216 бала емделуде. Ковидті клиникалардағы 228 науқастың жағдайы - өте ауыр, 1575-інікі — ауыр, 3671-інікі — орташа ауыр. ЖИТБ-де барлығы 407 пациент бар, ӨЖЖ аппаратында — 58, инвазивті емес ӨЖЖ аппаратында — 170, High flow — 161 аппарат», - делінген қала әкімдігінің баспасөз хабарламасында.

Бүгінде 11 908 науқас АМСК мен Телемедицина орталығының мобильді топтарының үй бақылауында, олардың 539-ы симптомсыз, 10839-ы жеңіл, 251-і орташа ауырлықта. Стационарлық науқастардың жалпы санынан 1 220 науқас инфекциялық стационарлардан шығарылып, амбулаториялық бақылауға және оқшаулануға жіберілді.

Қала басшылығының мәліметінше, жұқтырудың өсуінің себебі — тұрғындар қырағылығының жалпы төмендеуі, COVID-19 дельта вирусының тез жұғуы және отбасылық іс-шаралардың ұйымдастырылуы. 20-39 жас аралығындағы жастар арасында жұқтыру 1,6%-ға және 15-19 жас аралығындағы жасөспірімдерде 0,4%-ға өскен. Бұл олардың үлкен мобилділігінен және маска режимін елемеуінен,өзгелермен жиі байланыста болуынан.

«Үкіметтің тапсырмасына сәйкес медициналық қарсы көрсеткіштері барларды қоспағанда, мұғалімдер мен техникалық персоналды 100% вакциналау 25 тамызға дейін жүргізілуі тиіс», - деп атап өткен Б. Сағынтаев ата-аналардың да өз балаларының қауіпсіздігін ойлап, екпе салдыратынына сенетінін жеткізді.

Қазіргі уақытта СЭБД мамандарымен бірге мектептердің дайындығы тексерілуде. 20 тамызға дейін кварцтендіру, дезинфекциялау, маска режимі мен күнделікті термометриядан тұратын санитарлық талаптарға сәйкестігін тексеру аяқталуы тиіс. Мектептер мен балабақшалар Ashyq жобасына 100% қосылған және 1 қыркүйектен бастап жүйеде жұмыс жасауға дайын. Жүйе барлық оқу орындарында енгізілген, мұғалімдер, қызметкерлер және ата-аналарға осы жүйе бойынша ішке ене алады.

«Алматы қаласының білім беру жүйесінің қызметкерлері, оның ішінде білім берудегі жаңа технологиялардың ғылыми-әдістемелік орталығы, «Алматы дарыны» дарынды балалар мен дарынды жастарды анықтау мен қолдау орталығы, қалалық дене шынықтыру мен спорттың оқу-тәжірибелік орталығы, мемлекеттік балабақшалар мен мектептер, колледждер, интернаттар, қосымша білім беру ұйымдары 100% вакциналанған. Бұл ұйымдарда барлығы 36 825 адам жұмыс істейді, 32 113 адам вакциналауға жатады», - делінген хабарламада.

Сондай-ақ, жеке балабақшалардың ұжымдары — 100%, жекеменшік мектептер — 85%, қосымша білім беретін жеке ұйымдар 58% екпе салдырған.

×
Бұл желілік ресурстың ақпараттық өнімдері 18 жастан асқан адамдарға арналған.