ШұғылЕлімізде тағы 7778 адамнан коронавирус анықталды

Елордада тұрмысы төмен 4 мыңнан астам отбасыға азық-түлік таратылады

Азық-түлік таратуға еріктілер мен айналасына жанашырлықпен қарайтын тұрғындар көмектесіп жатыр

фото: astana.gov.kz

Нұр-Сұлтанда «Қайырымды істер» марафоны аясында Рамазан айында төрт мыңнан астам әлеуметтік жағынан аз қамтылған отбасыға азық-түлік себеті тапсырылады. Азық-түлік жиынтықтарын таратуға еріктілер мен айналасына жанашырлықпен қарайтын қала тұрғындары көмек көрсетіп жатыр.

Сонымен қатар, 17 наурызда «Ел тірегі – Елбасы» акциясы басталды. Бұл іс-шараға «Халық» қайырымдылық қоры бастамашылық етті. Аталмыш қор Нұр-Сұлтан қаласы бойынша мұқтаж отбасыларға 1 000-нан астам азық-түлік себетін тапсырды.

Өз кезегінде Болат Өтемұратов қоры «Ел тірегі – Елбасы» акциясын қолдап, сәуір айында елорданың мұқтаж отбасыларына азық-түлік жиынтығының 1000 себетін табыс етті.

Айта кетейік, биыл Наурыз мерекесі «Қайырымды істер» марафонының аясында өтті. Наурыз айында төрт мың мұқтаж отбасыға азық-түлік жиынтығы тапсырылды. Қайырымдылық істі жүзеге асыруға кәсіпкерлер, ірі ұйымдар, еріктілер және қала тұрғындары атсалысты. Пандемия кезінде дәрі-дәрмектерді, медициналық маскаларды тарату, зейнеткерлердің аулаларының қарын күреу, ағаш отырғызу және т.б. жұмыстар жүргізілді.

Сол сияқты қасиетті айды Нұр-Сұлтан қаласының Дін істері жөніндегі басқармасы мен діндерді зерттеу орталығы «Нұр-Астана» мешіті ұжымымен бірлесіп, аузы берік мұсылмандарға ыстық тамақ таратумен бастаған.