7 желтоқсанға арналған ауа райы болжамы

7 желтоқсан, сенбі күні еліміздің басым бөлігінде қатты жел соғып, қалың қар жауады, кей өңірлерде боран соғады, деп хабарлайды Azattyq Rýhy «Қазгидрометке» сілтеме жасап.

«Қазақстан аумағының басым бөлігінде Атлантикалық циклонның әсерінен құбылмалы ауа райы сақталады, жауын-шашын, шығыстың кей жерінде қатты жауын-шашын түседі, қалың қар жауады.

Тек республиканың батыс, оңтүстік-батыс, оңтүстік және оңтүстік-шығыс бөлігінде антициклон ықпалымен күн райы ашық болады. Республиканың кей жерінде тұман түсіп, көктайғақ болады, жаяу бұрқасын, күшті жел соғады. Еліміздің солтүстігі мен шығысында өте қатты жел соғады, екпіні 30 м/с немесе одан асып кетуі мүмкін», - дейді синоптиктер.

Ақмола, Солтүстік Қазақстан, Шығыс Қазақстан, Павлодар облыстарында жел 15-20, кей жерінде 23-28 м/с жетеді, жел екпіні 30 м/с және одан асып кетуі мүмкін. Кей жерлерде тұман, көктайғақ, жаяу бұрқасын болады. Қостанай облысында жел 15-20, екпіні 23 м/с болжанады, кей аумағында көктайғақ, тұман түсуі ықтимал.

Қарағанды, Ақтөбе облыстарының кей тұсында тұман болып, коктайғақ, жаяу бұрқасын болуы ықтимал, жел 15-20, екпіні 23-28 м/с күшейеді.

Қызылорда облысының кей аумағында тұман, көктайғақ күтіледі, жел 15-20 м/с күшейеді. Жамбыл, Түркістан, Атырау, Маңғыстау облыстарында тұман болады.

Алматы облысында тұман түсіп, көктайғақ болады, күндіз Жалаңашкөл ауданында жел 15-20 м/с күшейеді.