«Көргеніме қуаныштымын, GGG». Роналду мен Головкин бірге жаңа жобаға қатысады

Қазақстандық кәсіпқой боксшы Геннадий Головкин мен «Ювентус» клубы мен Португалия ұлттық құрамасының шабуылшысы Криштиану Роналду Италияның Турин қаласында кездесті. Бұл туралы танымал екі спортшы да Instagram парақшасында бірге түскен фотоларын жариялап, көпшіліктен сүйінші сұрады.

«Бүгін досым Криштиануды көргеніме өте қуаныштымын! @Daznglobal-нің қызықты жобасына қатыстық, өздеріңізбен бөлісуге асықпын», - деп жазды GGG.

Ал Криштиану «Ерекше досыммен қызықты жаңа жобада. Көргеніме қуаныштымын, GGG!» деген жазба қалдырған.

Айта кетерлігі, Роналду Головкинге италиялық «Ювентус» клубының 7 нөмердегі қолтаңбасы қойылған жейдесін сыйға тартты, ал Головкин португалдық футболшыға қолтаңбасы қойылған бокс қолғабын ұсынды.

Головкин бұған дейін де «Криштиану Роналду ерекше құрметтейтін футболшым» деп айтқан еді.