Талдықорған мен Текелі тұрғындары жер сілкінісін сезінді

4 желтоқсанда түнгі сағат 01:38-де Алматы облысының тұрғындары жерасты дүмпуін сезінді. Эпицентр Алматыдан солтүстік-шығысқа қарай 303 шақырым жерде орналасқан, деп хабарлайды облыстық ТЖД-ның баспасөз қызметі.

Жерасты дүмпуінің энергетикалық санаты – 11.1. MPV Магнитудасы– 5.2. Тереңдігі – 15 км.

ТЖД мамандарының мәліметінше, жер сілкінісін Талдықорған мен Текелі және жақын маңдағы ауыл тұрғындары сезінген.

«Дүмпу Қапал ауылында – 4 балл, Жансүгіров ауылында – 3 балл, Талдықорған мен Текеліде 3 балл деңгейінде тіркелген», - делінген аталған хабарламада.

Жер сілкінісі туралы ақпарат барлық құзырлы органға хабарланған. Зардап шеккендер және зақымданған ғимараттар туралы ақпарат жоқ.