Атырауда шектеу шараларын бұзған бірнеше нысан анықталды

Атырау қаласында кәсіпкерлік нысандарының иелеріне 3 млн теңгеге жуық айыппұл салынды, деп хабарлайды Azattyq Rýhy тілшісі Атырау қаласының санитариялық-эпидемиологиялық бақылау басқармасына сілтеме жасап.

Мобильдік топтар рейд кезінде карантиндік шектеу шараларын бұзған бірнеше нысанды анықтаған.

«Қоғамдық тамақтану объектілерінің, ойын-сауық мекемелері мен дүкендердің иелері ҚР Әкімшілік құқық бұзушылық туралы Кодексінің 425-бабы, 1-тармағымен әкімшілік материал жасау үшін Атырау қаласының санитариялық-эпидемиологиялық бақылау басқармасына шақырылды. Олардың арасында «Салам Бро», «Маша и Медведи», «Чечил паб», «КЭШ» караоке клубы, «Vobla» дәмханасы, «Алкомаркет» дүкені, «Керуен»,«Айва» мейрамханалары, «Регионбет» лото-клубы мен «Тuki doner» донерханасы секілді кәсіпкерлік нысандары бар. Аталған нысандардың иелеріне 2 млн 858 мың 660 теңге айыппұл салынды» - делінген басқарма таратқан ақпаратта.