Көкшетауға ПТР-тест нәтижесінсіз кіруге тыйым салынды

Ақмола облысында карантин шараларын қатаңдату туралы жаңа қаулыға қол қойылды

Көкшетауға ПТР-тест нәтижесінсіз кіруге тыйым салынды
Фото ашық дереккөзден

Көкшетау коронавирус инфекциясына шалдыққан науқастардың күрт көбеюіне байланысты «сары аймақ» қатарына кірді. Эпидемиялогиялық талаптарға сәйкес, енді қалаға ПТР-тестінің нәтижесі жоқ адамдарға кіруге тыйым салынады. Бұл туралы өңірлік коммуникациялар қызметінде өткен брифингте облыстың бас санитар дәрігері Айнагүл Мусина мәлім етті, деп хабарлайды Azattyq Rýhy тілшісі.

Жаңа қаулы ережелеріне сәйкес, Көкшетау қаласы Красный Яр ауылына қарасты Чайкино және Станционный кенттерінде кешкі 21:00-ден таңғы алтыға дейін жүруге, ал түнгі 23:00-ден таңғы алтыға дейін автокөліктердің жүруіне тыйым салынды. Отбасылық шараларды өткізуге, қоғамдық тамақтану нысандарында бұқаралық ісшаралар ұйымдастыруға және баруға тыйым салынды.

65 жастан асқан адамдарға алғашқы қажетті азық-түлік пен дәрі-дәрмек алу, яғни шұғыл жағдаймен медицина мекемеге барудан басқа жағдайда үйден шықпау ұсынылды.

Ал жерлеу рәсімінде отбасы мүшелерінен 30 адамнан аспайтын ғана адам жиналуына рұқсат етілді.

Барлық көңіл көтеру орындарының (караоке, түнгі клубтар, аттракциондар, балалар ойын алаңдары компьютерлік клубтар т.б) жұмысына тыйым салынады.

«Коронавирус инфекциясына шалдыққан адамдардың еселеп көбеюіне байланысты біз «сары аймаққа» кірдік. Әсіресе, соңғы мәліметтер бойынша Көкшетау, Бурабай, Степногорск және Біржан сал аудандарында індетке шалдыққандар күрт артқан. Енді Ақмола облысының аумағына ПТР-тест қорытындысынсыз өткізілмейді. ПТР-тест 9 мың теңге тұрады және ол тек үш күнге ғана жарамды», - дейді облыстың бас санитар дәрігері Айнагүл Мусина.

Сондай-ақ, қаулыға сәйкес ашық аспан астындағы аттракциондардың жұмысына, мәдениет нысандарына, театр және кинотеатр қызметіне тыйым салынды. Азық-түлік дүкендері таңғы 09:00-ден кешкі 20:00-ге дейін жұмыс істемек. Ал, 500 шаршы метрден аспайтын азық-түлік сатпайтын сауда орындары таңғы 10:00-ден кешкі 19:00- ге дейін сенбі кешкі 17:00-ге дейін жұмысын жалғастырады.

Қоғамдық тамақтану нысандарына 50 пайыздық қуатпен тек 30 орынға ғана жұмыс істеуге рұқсат етілмек. Ал демалыс және мереке күндері тек жеткізуді жүзеге асыратын нысандар қызмет етеді.

Қоғамдық көліктерге жұмыс уақытын таңғы 07:00-ден кешкі 20:00-ге дейін, сенбі күндері таңғы сегізден 10:00-ге дейін және кешкі 17:00-ден 20:00-ге дейін жұмыс істейді. Шаштараз, сән салондары алдын ала жазылу тәртібі бойынша таңғы 08.00-ден кешкі 19:00-ге дейін, монша және сауналар таңғы 08:00-ден кешкі 19:00-ге дейін жұмысына рұқсат берілді.

Қаулы 13 қараша күні түнгі 00:00-ден бастап күшіне енбек.

Абзал Алпысбайұлы, Ақмола облысы

×
Бұл желілік ресурстың ақпараттық өнімдері 18 жастан асқан адамдарға арналған.