Профессер коронавирусты қайта жұқтырмауға 100% кепілдік жоқ екенін айтты

Қазақстанның Профилактикалық медицина академиясының президенті Алмаз Шарман коронавирустан жазылғандардың қауіпсіздік және алдын алу шараларын сақтау қажеттігіне қатысты сұрақтарға жауап берді.

«Коронавируспен ауырып, жазылғандар да қауіпсіздік шараларын сақтауы керек. Себебі, коронавирустан бөлек басқа да инфекциялар бар. Әсіресе, қазір тұмау маусымы басталып жатыр. Сіз коронавирустан жазылып шықсаңыз да, вирус мұрын қуысында болуы мүмкін және вирус қол арқылы жұғуы мүмкін. Сол себепті қалай болғанда да, масканың тиімділігі бар. Әлеуметтік қашықтықтың да маңызы зор. Коронавирусты қайтадан жұқтырудың 5 оқиғасы белгілі. Осындай фактілер бар. Сол себепті, қайтадан жұқтырудың болмайтынына 100 пайыз кепілдік жоқ», — деп атап өтті А. Шарман.

Зерттеулерге сәйкес, індеттен жазылып шыққан адамдарда антидене пайда болып, дамиды. Бірақ оның қанша уақыт сақталатыны белгісіз.

«Ауру жұқтырғандардың бәрінің иммунитеті дамитыны белгілі нәрсе. Сонымен бірге, басылу (сөну) феномені де бар, антиденелердің бастапқыда циклы жоғары болады, бірақ неге екені белгісіз, кейін төмендеп кетеді. Үшінші жағдай бар, ол – вирустың мутацияға ұшырайтыны, ол өзгеріп отырады. Соған қарамастан, оның өзгеріп отыратыны, дереу күшейіп, болмаса әлсірейтіні туралы дәлелдер бар», - деп атап өтті профессор.

Профессор масканы дұрыс қолданудың маңыздылығына тоқталды. Одан бөлек, әлеуметтік қашықтықты сақтау және адамдар көп жиналатын орындарға бармау секілді алдын алу шараларына тоқталды.

«Маска тағу өте маңызды. Бірақ масканы дұрыс таққан жөн. Мен көп адамның масканы иегіне тағып жүретінін жиі көремін. Бәріне вирустың көбі мұрын қуысында болатынын ескертемін. Жай ғана ауызды жабу – өзіңді де, басқаны да қорғамайды. Маска тағу және оны дұрыс тағу маңызды. Екіншіден, маска тағу арқылы сіз тек өзіңізді ғана қорғап қоймай, басқаларын да ойлайсыз. Үшіншіден, адамдар көп жиналатын орындардан аулақ жүруге тырысу қажет. Еуропа мен АҚШ-та неге екінші толқын басталып кетті? Күн суытқан соң, адамдар ғимарат ішінде жиі отыратын болды. Нәтижесінде, адамдар топтасады, ал көптеген ғимаратта желдету жағдайы қиын. Бұл - темекі түтіні сияқты. Егер сен ауасы желдетілмейтін бөлмеде отырсаң, темекі түтіні бөлмеде айналып жүреді. Егер ғимаратта вирусты жұқтырған адам болса, вирусы бар аэрозоль ауада таралып, басқаларға жұғады. Сол себепті, адамдар көп жиналатын орындардан, әсіресе, жабық ғимараттарға барудан аулақ жүріп, бөлмені желдетіп, қашықтық сақтау керек. Осы ережелерді сақтау арқылы өзіңді аурудан қорғауға болады», - деп қорытындылады профессор.