Швейцария Қазақстанды карантиндегі елдер тізімінен шығарды

Швейцарияның қоғамдық денсаулық сақтау жөніндегі федералды басқармасы Қазақстаннан келген адамдарды карантинге жатқызбайтын болды. Бұл туралы бүгін ҚР Денсаулық сақтау министрі Алексей Цой мәлім етті.

Жалпы, Алексей Цой Қазақстанда коронавирус инфекциясына қатысты эпидемиологиялық жағдай тұрақталып жатса, Еуропа мен Азиядағы бірқатар елдерде тамыз айында ауру күрт көбейіп кеткенін еске салды. Мысалы, Италия, Австрия, Германия, Испания, Оңтүстік Корея, Түркия елдерінде қазір ауру жұқтырғандар саны қайта көбейіп кеткен.

«Ал ТМД елдеріндегі аурудың өсім көрсеткіші 0,5% құрап отыр. Бұл Қазақстанды жеке алғандағы көрсеткіштен 5 есе көп», - дейді Цой.

Дүниежүзілік денсаулық сақтау ұйымы хабарлағандай, ел үкіметтері эпидемиологиялық жағдайды тұрақтандыру үшін тізгінді қолына алу керек, ал халық үкімет бекіткен шектеу шараларын қатаң ұстануы керек.

«Коронавирус инфекциясымен күресте қоғамның іс-әрекеті өте үлкен рөл атқарады. Сондықтан, профилактика маңызды. Жақсы жаңалықтардың бірі ретінде – Швейцария Қазақстанда карантин тізімінен шығарды, яғни, Қазақстаннан барған азаматтар онда карантинге жатпайды. Ал Швейцарияға келген басқа ел азаматтары карантинге жатады. Бұл – Қазақстанның коронавируспен күресте ұстанып отырған  тәсілі дұрыс екенін көрсетіп отыр», - деді Цой Үкімет мүшелерінің алдында.

Кенжекей Тоқтамұрат, Нұр-Сұлтан