2021 жылы Алматыда бес спорт кешені салынады

Дене шынықтыру-сауықтыру кешендерінде спорттың ойын түрлеріне, хореографияға, көркем гимнастикаға арналған залдар орналастырылады. Бесеуінің екеуінде бассейндер болады, деп хабарлайды Azattyq Rýhy тілшісі inAlmaty.kz-ке сілтеме жасап.

Алматының қоғамдық кеңесінде Алматы дене шынықтыру және спорт басқармасының 2020 жылдың бірінші жартыжылдығындағы жұмыс қорытындысы бойынша есебі өтті. Басқарма басшысы Рүстем Байсейітов Алматыда спорт нысандарының 31% тапшылығы байқалатынын айтты. Оны жою үшін Жетісу, Медеу және Түрксіб аудандарында бес дене шынықтыру-сауықтыру кешенін салу жоспарлануда.

«2021 жылы жалпы ауданы 15 мың шаршы метр болатын бес ДСК құрылысы жоспарланған. Бұл арзан конструкциялардың оңай салынатын кешендері. Міндетті түрде оларда спорттың ойын түрлеріне арналған залдар, хореография, көркем гимнастика залдары болады. Бесеуінің екеуінде бассейндер, сондай-ақ жекпе-жек залдары болады. Қазір типтік ЖСҚ әзірлеу аяқталуда, ал 2020 жылдың екінші жартысында құрылысқа кірісеміз. Кешендер орналастырылатын учаскелерді таңдау кезінде қаланың шеттері ескерілді. Барлық бесеуі орталықтан алыс аудандарда салынады», - деді басқарма басшысы.

«Жұмыспен қамтудың жол картасы» бағдарламасы бойынша Алматыда үш ірі спорт нысаны — Спорт сарайы, Атлеттер ауылы және «Медеу» спорт кешені ағымдағы жөндеуден өтеді. Олардың екеуі 10 жылдан астам уақыт бойы жөнделмеген. Жұмыстарды қазан айына қарай аяқтау көзделуде. Сондай-ақ, жергілікті бюджет есебінен шаңғы трамплиндері кешені жөнделіп, сенімді басқару аясында кешеннің екінші кезегі салынады. Алатау ауданында 12 кортқа арналған теннис орталығын салу жоспарлануда.