Өскеменде домофон есігін ұстаған жас жігітті тоқ соғып, жүрегі тоқтап қалды

Өскемен қаласында подъезд есігінен электр тоғы соғып, жас жігіт ауыр халде ауруханаға жеткізілді, деп хабарлайды Azattyq Rýhy.

Желідегі мәліметке сүйенсек, соққының күшті болғаны соншалық, бірнеше метрге лақтырып жіберген, салдарынан жүрегі тоқтап қалған.

Зардап шеккен азамат шұғыл түрде медициналық мекемеге жатқызылды.

Тұрғындардың айтуынша, домофон орнатылған есік шамамен бір ай бойы тоқ соғып тұрған. Алайда осы уақыт аралығында тиісті шаралар қабылданбаған.

Оқиға туралы ақпарат қала әкімдігіне жолданған. Мамандар тексеру барысында токтың соғуына есіктің үстіне орнатылған прожектор шамы себеп болған. Аталған шам ажыратылып, қауіп жойылды. Қазір оқиғаның мән-жайы анықталып жатыр.