«Гарант-24» қаржы пирамидасын құрғандардың бірі Мәскеуде ұсталды

«Гарант-24», «Выгодный займ» және «Estate Lombard» қаржы пирамидаларын құрушылардың бірі Мәскеуде ұсталды деп хабарлады Polisia.kz.

29 жастағы С. Фролов ірі көлемде алаяқтық жасады деген айыппен халықаралық іздеуге жарияланған болатын. Ол аталған пирамидалар арқылы халықтың миллиондаған ақшасын қалтасына басқан деп айыпталуда.

«Бұған дейін Нұр-Сұлтан қалалық соты Фроловты қамауға алу туралы шешім шығарған болатын. Қазақстан мен Ресей полицейлерінің бірлесіп атқарған жұмысының нәтижесінде ол ұсталды, енді елге экстрадицияланып, сотталатын болады», - деді ҚР ІІМ Тергеу департаментінің басшысы Санжар Әділов.

Қылмыстық істі Ақтөбе қаласында Ішкі істер министрлінің арнайы шұғыл-тергеу тобы жүргізіп жатыр. Бүгінгі таңда барлығы 15 мың жәбірленуші бар. Оларға келтірілген шығын көлемі 20 млрд теңгеден асады.