Алматыда блок-бекеттегі апаттан жараланған үшінші полицейдің бас сүйегіне операция жасалды

Алматыдағы блок-бекетте 25 мамырда болған жантүршігерлік жол апатынан зардап шеккен үшінші полицейдің бас сүйегіне трепанация жасалды. Дәрігерлер оның жағдайы ауыр екенін айтты.

Облыстық Қоғамдық денсаулық сақтау басқармасының мәліметінше, Еркебұлан Сейдазым №7 қалалық клиникалық ауруханада жасанды тыныс алу аппаратына қосылған.

«Ол жабық бас-сүйек жарақатын, мидың ауыр жарақатын алған және миына қан құйылған. Бас сүйектің желке тұсы және беттің сүйегі сынған», - деді №7қалалық клиникалық аурухана бас дәрігері орынбасарының міндетін атқарушы Ильдар Курмаев.

Жараланған полицейге бас сүйегіне трепанация және бас-сүйек ішіне ұйыған қанды тазалау бойынша екі операция жасалған.

«Науқастың жағдайы тұрақты ауыр. Бүгін бас сүйегіне қайта томография жасалды. Өкпесі жасанды тыныс алу аппаратына қосылған. Жансақтау бөлімінде интенсивті терапия жүргізіліп жатыр», - деді дәрігер.

Еске салайық, 25 мамыр таңғы уақытта Алматыдағы №4 блок-бекетте BMW автокөлігі аса жоғары жылдамдықта полиция көлігін соққан болатын. Көлікте отырған екі инспектор қаза тапты. Мас жүргізуші көлікке соқтығысар алдында жолда тұрған тағы бір полицей Ербұлан Сейдазымды қағып кеткен.

Белгілі болғандай, BMW автокөлігін тізгіндеген жүргізуші бұған дейін 6 жыл ішкі істер органдарында жұмыс істеген екен.