Мектеп директоры шатасып кетті - Тәжібаев қарындастарын жұмысқа алатын басшы туралы
Облыс әкімінің орынбасары мектепте мұғалімдер тек конкурспен өтеді деп сендірді
Төле би ауданындағы мектеп директоры мұғалімдердің 80 пайызы өз қарындастары екенін айтқаннан кейін оқу ошағына қызметтік тексеріс басталды. Бұл туралы Azattyq Rýhy тілшісіне Түркістан облысы әкімінің орынбасары Бейсенбай Тәжібаев айтты.
Шенеуніктің сөзінше, өзбек мектебінің директоры ойын дұрыс жеткізе алмаған. Шындығында оның туыстары мектепте істемейді.
«Мектеп мұғалімдері арнайы конкурспен жұмысқа алынады. Ханарық мектебінде конкурсқа 4 адам қатысқан. Ешқайсысы өтпеген. Өтпеген азаматтар жайлы шағымдар болған. Өзбек мектебінің директоры өз ойын дұрыс жеткізе алмай, шатасып тұр. Алдын ала мәліметтер бойынша оның туысқандары мектепте жұмыс істемейді. Бұл мәселе бойынша біз қызметтік тексеру жүргізіп жатырмыз, қорытындысы шыққан соң, нақты жауабын айтамыз», - дейді ол.
Бұған дейін Түркістан облысы Төле би ауданындағы Ханарық жалпы орта білім беретін мектептің директоры 14 жыл бойы мектепке туыстарын ғана жұмысқа алғаны жөнінде жергілікті БАҚ хабарлаған еді. Директордың өзі қазіргі мұғалімдердің 80 пайызы өз қарындастары екенін растаған.
