Астанада ер адам құрылыс алаңынан 40 тонналық контейнерді ұрлап кеткен
Алынған айғақ заттар иесіне қайтарылды
Құрылыс алаңында жұмыс біраз уақыт бойы тоқтап тұрған. Меншік иесі жүйелі түрде тексеріс жүргізген, бірақ ұрлық болған күні нысан қараусыз қалған, деп хабарлайды Azattyq Rýhy қалалық полиция департаментіне сілтеме жасап.
Ұзақ уақыт бойы аумақта ешқандай жұмыс жүргізілмейтінін байқаған қаскүнем контейнерге көзін салып, жоспарын жүзеге асыру үшін кран-манипуляторды жалға алған.
Осылайша, көлікті пайдалана отырып, аумаққа еркін кіріп, салмағы 40 тонна темір контейнерді шығарып, 2 млн 800 мың теңге материалдық шығын келтірген.
«Жедел іздестіру шаралары барысында полицейлер 42 жастағы ер адамды анықтады. Ол контейнерді 1 миллион теңгеге қайта сатқанын мойындады. Алынған айғақ заттар иесіне қайтарылды», - делінген хабарламада.
