Маңғыстау облысы Батыр ауылында қаңғыбас иттер ешкілерді талап тастады

Мұнайлы ауданы Батыр ауылының тұрғыны 40 асыл тұқымды ешкісін бес қаңғыбас ит талап тастағанын айтты. Ешкі өсіру отбасындағы жалғыз табыс көзі болған, деп хабарлайды Azattyq Rýhy Lada.kz-ке сілтеме жасап.

29 шілде күні таңертең бес қаңғыбас иттің қораға кіріп, 40 ешкіні талап тастағаны туралы Батыр ауылының тұрғыны Құмар Нұрпейісова жеткізді.

«Мен кәсіпкерлер палатасына, облыстық кәсіпкерлік бөлімінің басшысына бардым. Ешкім көмектескен жоқ. Облыс әкіміне жазылдым. Ешқандай назар аударған жоқ», – деп шағымданды әйел.

Оның айтуынша, ол ешкі өсіру үшін «Нұр-Капитал» бағдарламасы бойынша несие алған.

«Менің өнімдерім Мұнайлы ауданының тұрғындарына сатылып, сүт, ірімшік, құрт, қаймақ және ешкі сүтімен қамтамасыз ететін. Бұл менің жалғыз табыс көзім еді, ал қаңғыбас иттер екі сағаттың ішінде бәрін талап тастады», – деп айтты әйел.