Семейде суға батып кете жаздаған екі адам құтқарылды
Қазіргі уақытта құтқарылғандардың жағдайлары қанағаттанарлық
Семей қаласындағы Ертіс өзенінің жағалау аймағын жаяу патрульдеу кезінде Абай облысы ТЖД 2 қызметкері бар жаяу патруль «Малый Котлован» аумағында суға батып бара жатқан қызды құтқарды, деп хабарлайды Azattyq Rýhy ТЖМ баспасөз қызметіне сілтеме жасап.
«Ақпарат жинау барысында азаматша шомылу кезінде аяқтары тартылып, суға бата бастаған. Суға батып бара жатқан қызды көрген бөлімше командирі азаматтық қорғау сержанты Жұматай Әмір көмекке асықты. Қызды жағаға жеткізгеннен кейін қызметкер оған алғашқы медициналық көмек көрсетті», - делінген хабарламада.
Екінші оқиға Бобровка саяжайы ауданында 14 сағат 07 минутта болды, онда жаяу патрульдеу кезінде Абай облысы ТЖД қызметкерлері өзіне қол жұмсамақ болған 1943 жылы туған ер адамды судан құтқарды. Ол полиция қызметкерлеріне табысталды.
Қазіргі уақытта құтқарылғандардың жағдайлары қанағаттанарлық, олар медициналық көмекке мұқтаж емес.
