Алматыда жол апаты кезінде жедел жәрдем көлігі аударылды

Жексенбі күні кешкісін Алматыдағы Құлжа трассасының бойында экобекетке жетпей, жаппай жол апаты болды.

Куәгерлердің айтуынша, Nissan Maxima және Lexus GS300 автокөліктері Құлжа трассасының бойымен солтүстік бағытта келе жатқан. Алда кептеліс пайда болып, Maxima тоқтайды. Ал Lexus арнайы жолаққа шығып кетеді, бұл кезде науқас мінген жедел жәрдем көлігі оңтүстік бағытта келе жатқан.

Жедел жәрдем жүргізушісі апатты болдырмауға тырысқан, алайда үгермеген. Салдарынан Lexus жедел жәрдемге бар жылдамдықпен соқтығысады. Арнайы көлік аударылып, кептелісте тұрған Nissan Maxima көлігін соғып кетеді.

Апат салдарынан үш адам зардап шекті: жедел жәрдем көлігінде болған науқас пен фельдшер және Lexus жүргізушісі.

Үшеуі де түрлі дене жарақатымен ауруханаға жеткізілді.

Апаттың мән-жайын анықтау үшін оқиға орнына жол полициясының қызметкерлері шақыртылды.