Атырау облысында пәтер өртеніп, екі бала көз жұмды
Тағы екі адам жансақтау бөлімінде жатыр
Атырау облысында пәтер өртеніп, екі бала қайтыс болды, деп хабарлайды Azattyq Ruhy Атырау ТЖД баспасөз қызметіне сілтеме жасап.
25 сәуірде сағат 5:37-де Индер ауданы Индербор кенті Махамбет көшесіндегі 5 қабатты тұрғын үйлердің бірінде түтін шығып жатқаны туралы хабарлама түскен.
Өрт сөндірушілер оқиға орнына жеткен кезде бес қабатты тұрғын үйдің 2-қабатындағы пәтердің толық жанып кеткенін анықтады.
«Өрт кезінде үйдің жатын бөлмесінен 2014 жылы және 2017 жылы туған екі баланың денесі табылды. Сондай-ақ, балалардың анасы - 1995 жылғы әйел мен 1994 жылы туған ер адам ес-түссіз күйде табылып, аудандық орталық аурухананың жансақтау бөліміне жеткізілді», - деп жазылған хабарламада.
Өрт сағат 06:02-де оқшауланып, сағат 06:10-да толықтай сөндірілді.
Өрттің шығу себебі анықталып жатыр.
