Атырауда 15-қабаттан секірмек болған әйел құтқарылды

Атырауда 15-қабаттың балконынан секіруге оқталған 28 жастағы әйел құтқарылды. Бұл туралы облыстық ПД баспасөз қызметі мәлім етті, деп хабарлайды Azattyq Rýhy.

Департаменттің мәліметінше, оқиға бүгін, 31 қазанда болған.

«Атырау қаласының 28 жастағы тұрғыны «Алмагүл» шағын ауданында орналасқан тұрғын үйдің 15-қабатындағы балконынан секіруге оқталды. Бұл туралы тұрғындардан жергілікті уақытпен сағат 14:21 шамасында 102-арнасына хабар түсті. Қалалық полиция басқармасы жедел басқару орталығының қызметкерлері бейнебақылау камерасы арқылы оқыс қадам жасағалы тұрған әйел туралы ақпаратты патрульдік полиция қызметкерлеріне бағыттама берді», - делінген хабарламада.

Патрульдік полиция батальоны қызметкерлері Аян Сансызбаев пен Ильяс Қобдабаев оқиға орнына жедел жетіп, 28 жастағы әйелмен профилактикалық сұхбат жүргізген. Содан соң шұғыл құтқару әрекетіне көшкен.

«Белгілі болғандай, 1995 жылғы әйелдің жеке өмірінде түрлі қиындық туындаған. Ол сол себептен жоғарғы қабаттағы балконнан секіруге оқталған. Қазір ол жедел-тергеу тобына тапсырылды», - деп хабарлады департаменттен.