Батыс Қазақстанда контейнер мен екі автобус түгі қалмай жанып кетті
Қазіргі кезде өрттің шығу себебі мен келтірілген шығын анықталып жатыр
Батыс Қазақстан облысында контейнер мен екі автобус жанып кетті. Бұл туралы БҚО ТЖ департаментінің баспасөз қызметі мәлім етті, деп хабарлайды Azattyq Rýhy.
Департамент мәліметінше, оқиға 9 шілде күні Бәйтерек ауданы Мичурин ауылында болған.
«Сағат 03.08-де Завод көшесі 14/3-мекенжайында «Восход» ЖШС аумағында автобөлшектерімен темір контейнер (20 шаршы метр) отқа оранды. Сондай-ақ «ПАЗ» маркалы екі автобустан түк қалмады. Оған қоса жалын Митсубиси Кантер автокөлігі базасындағы иінді көтергіш пен «Лада Веста» жеңіл көлігін ішінара шарпыды. Тілсіз жау сағат 03.45-те оқшауланып, 04.08-де ауыздықталды. Қазіргі кезде өрттің шығу себебі, келтірілген шығын анықталып жатыр», - делінген хабарламада.
