Атырау облысында егіз қыздар терезеден құлап кетті
Оқиға кезінде қыздардың анасы көрші бөлмеде отырған
Атырау облысында 2017 жылы туған екі қыз бала терезеден құлап, түрлі жарақатпен облыстық балалар ауруханасына жеткізілді, деп хабарлайды Azattyq Ruhy.
Облыстық полиция департаментінің мәліметінше, жазатайым оқиға 27 маусым күні кешкі уақытта болған. Оқиға кезінде қыздардың анасы көрші бөлмеде отырған.
«Сағат 22:10-да Полиция департаментінің жедел кезекші бөліміне Нұрсая ықшамауданында ересектердің қарауынсыз (анасы көрші бөлмеде болған) қалған екі егіз қыздың терезенің москитті торына сүйеніп тұрып, үшінші қабаттан құлап кеткені туралы хабар түсті», - деп хабарлады облыстық ТЖД баспасөз қызметі.
Құтқарушылар қайғылы оқиғаның басты себебі, балалар аша алатын терезелердің дұрыс бекітілмеуі. ТЖД өкілдері москитті тордың қауіпті екенін, балалар оған сүйенбек болғанда бірден құлап кететінін айтады. Сондай-ақ терезенің жанында бала көтеріле алатын тумба немесе орындық қойылмауы тиіс.
«Балалар әсіресе, ата-анасы жақын жерде болса қауіпті сезе бермейді: бір минутқа көзіңізді тайдырсаңыз, қиындық туындауы мүмкін! Бес жасқа дейінгі балалар (80% жағдайда) қауіпті жайтқа жиі тап болады», - деді ТЖД өкілдері.
