БҚО-да өзіне оқ атқан тұрғынға қатысты оқиғаның мән-жайы анықталды
Қуанышқа орай, ер адамды ауыл дәрігерлері аман алып қалды
БҚО-да ер адам әйеліне ренжігендіктен өзіне қол жұмсап өлмек болған, деп хабарлайды Azattyq Rýhy.
БҚО полиция департаментінің баспасөз қызметінің мәліметінше, оқиға 12 наурызда Казталов ауданында болған.
Белгілі болғандай, 59 жастағы ер адам таң атпастан өз үйінде ішімдік ішуге бел буған. Кейін достарын үйіне шақырып, «көңілді сәтін» қыздыра түседі. Алайда түске таман әйелі ер адамды достарымен бірге үйден қуып шыққан. Сол кезде үй иесі өзімен бірге аңшы мылтығын ала кетеді. Үшеуі бірінің үйіне баруды ұйғарып, ішімдік ішуді жалғастырады.
«Бөтелкелестері ұйқыға кеткенде, ер адам сарайға барып, қарумен өзіне оқ атқан. Оның көріп қалған досының әйелі дереу жедел жәрдем шақырған. Өзіне қол жұмсау әрекетінің басты себебі жұбайына деген реніш болған», - дейді полиция өкілдері.
Оқи отырыңыз: БҚО-да ауыл дәрігерлері өкпесіне оқ тиіп жараланған тұрғынды құтқарды
Қуанышқа орай, ер адамды ауыл дәрігерлері аман алып қалды. Дәрігерлер оның өкпесі мен төрт қабырғасы жараланғанын, сондай-ақ, екі литрдей қан жоғалтқанын анықтаған. Ер адамға Казталов ауруханасында шұғыл ота жасалды. Қазір жағдайы жақсарған тұрғын үйіне шығарылды.
