Алматы облысында қожайын жұмысшысын көлікпен қағып, 9 қабырғасын сындырған
Жұрттың ашуын тудырған оқиға Ақсу ауданында болған
Алматы облысында шаруа қожалығының иесі өзінің мал бағатын жұмысшысын ұрып-соғып, 9 қабырғасын сындырған. Қазір малшы ауруханада жатыр, деп хабарлайды Azattyq Rýhy тілшісі.
Алматы облыстық полиция департаменті баспасөз қызметінің мәліметінше, 2 мамыр күні ауруханаға ауыр дене жарақатымен 44 жастағы ер адам түскені жөнінде хабарлама келген.
Тергеу барысында азаматты қожайыны соққан. Ал таяқ жеген жігіт отбасымен бірге оның малын баққан. Жұрттың ашуын тудырған оқиға Ақсу ауданында болған.
«Қазір күдікті ұсталды. Ол – Талдықорғанның 43 жастағы тұрғыны. Оның көлігі де тәркіленді. Медициналық тексеру кезінде күдіктінің жеңіл түрде ішімдік ішкені анықталды. Қазір оның үстінен ҚР Қылмыстық кодексінің 106-бабы, яғни қасақана денсаулыққа зиян келтіру бойынша қозғалған қылмыстық іс ҚК 24-бабы 3-тармағы және 99-бабының 2-тармағы бойынша қайта сараланды, яғни адам өлтіруге оқталу деген ауыр айып тағылды»,- деді облыстық ПД баспасөз қызметі.
Малшы екі кішкентай кәмелетке толмаған баласын және әйелін алып, қожалықтан кетпекші болған. Жұмысшысының кетуіне қарсы болған фермер оларды иен далада қуып жетіп, көлікпен қаққан.
