Тоқаев отбасын өлтірмек болған қаскөйдің қолынан қаза тапқан полицейді марапаттады

«Қызметтік борышын атқару үстінде көрсеткен ерлігі мен жанқиярлығы үшін Ішкі істер министрлігі Қостанай облысы Полиция департаменті Қостанай ауданы полиция бөлімінің полицейі Дархан Серікұлы Базарбаев ІІІ дәрежелі «Айбын» орденімен наградталсын (марқұм)», - делінген Президент жарлығында.

Оқиға 19 қаңтарда болған. Тобыл қаласында Комсомольская көшесінде орналасқан үйде жанжал болып жатқаны туралы хабарлама түскен. Полиция экипажы оқиға орнына алты минутта жеткен. Полиция сержанттары Дархан Базарбаев және Амангелді Сыздықова шағымданушыдан 28 жастағы Тобыл тұрғыны мас екенін және отбасын өлтіремін деп қорқытқаны туралы естиді. Қолында пышағы бар ер адамды ұстау кезінде полиция қызметкері жарақат алған. Сосын жедел жәрдем жеткенше полиция өкілдерінің бірі Дархан Базарбаев оқиға орнында көз жұмған. Артында төрт айлық баласы қалды.

Қазіргі кезде күдікті қамауға алынды, ҚР Қылмыстық Кодекстің 99 бап, 2 бөлім бойынша сотқа дейінгі тексеру жұмыстары жүргізілуде.