Bek Air ұшағының өздігінен жазғыш деректері оқылды

Azattyq Rýhy

МАК ұшақ апатына қатысты үкіметтік комиссия жұмысына белсенді қатысып жатқанын жеткізді

Алматы түбінде апатқа ұшыраған Fokker-100 ұшағындағы борттық өздігінен жазғыш деректері оқылып, таратып жазу жұмыстары аяқталды, деп хабарлайды Azattyq Rýhy Tengrinews.kz сайтына сілтеме жасап.

Мемлекетаралық авиация комитетінің (МАК) мәліметінше, Азаматтық авиация туралы және әуе кеңістігін пайдалану туралы мемлекетаралық келісімге сәйкес, комитет 2019 жылғы 27 желтоқсанда Алматы әуежайында ұшу кезінде болған Bek Air әуекомпаниясының Fokker-100 ұшағының апатқа ұшырауын тексеру жөніндегі үкіметтік комиссияның жұмысына белсенді қатысып жатыр.

«МАК мамандарының тобы оқиға орнына келіп, алғашқы күннен бастап тікелей комиссия құрамында жұмыс істейді. МАК тексеруге толық ғылыми-техникалық қолдау көрсетеді. МАК-тың ғылыми-техникалық орталығында авиациялық оқиға болған жерде анықталған борттық өздігінен жазғыш (дыбыстық және параметрлік) деректерін оқу және таратып жазу орындалды. Барлық ақпарат тергеу комиссиясына берілді. Осы ақпаратты алдын ала талдау оқиғалардың хронологиясын қалпына келтіруге және авиациялық оқиға себептерінің басым нұсқасын анықтауға мүмкіндік берді», - делінген МАК хабарламасында.

Бұл ақпаратты Қазақстан Үкіметінің вице-премьері Роман Склярдың баспасөз конференциясы барысында жұртшылыққа жеткізілгені айтылады.

Халықаралық Азаматтық авиация ұйымының (ХААҰ) стандарттарына - Чикаго конвенциясының 13-қосымшасына сәйкес тексеруге әуе кемесін әзірлеуші және жасаушы мемлекеттің уәкілетті өкілі мен кеңесшілері (Нидерланды) қатысады. Нидерландының уәкілетті өкіліне параметрлік жазба берілген.

«Тексеру жөніндегі комиссияның шешімі бойынша МАК Нидерланды, Қазақстан және EASA мамандарымен бірлесіп авариялық ұшу кезінде әуе кемесінің нақты аэродинамикалық сипаттамаларын және оларға сыртқы факторлардың (бірінші кезекте жердегі мұздану және т.б.) әсерін анықтау, әуе кемесінің қозғалыс параметрлерін және экипаж әрекеттерін талдау мақсатында жүргізілетін ұшуды математикалық үлгілеу бойынша жұмыстар басталды», - делінген хабарламада.

Бұған дейін премьер-министрдің орынбасары Роман Скляр ұшақ апатының негізгі нұсқасы деп әуе кемесінің мұздануын атаған болатын. Әуе кемесі ұшар алдында арнайы мұздануға қарсы сұйықтықпен жартылай өңделгені айтылған - тек тұрақтандырғышы, ал қанаттары өңделмеген.

Еске салайық, Алматыдан Нұр-Сұлтанға ұшып шыққан Fokker-100 ұшағы 2019 жылдың 27 желтоқсанында таңертең әуе апатына ұшыраған болатын. Лайнер Алматы әуежайына жақын жерде құлаған. Бортта 93 жолаушы және экипаждың бес мүшесі болған. Апат салдарынан 12 адам қаза тапты.
 

‡àãðóçêà...
Сұхбат
Абайдың 45 сұрағына белгілі режиссер, жазушы Ермек Тұрсынов жауап берді
«Абайдың 45 сұрағы» жобасының кезекті қонағы - филолог, абайтанушы Омар Жәлел
Ирактан Қазақстанға қайтарылған 14 баланы ортаға бейімдеу жұмыстарымен айналысып жатқан психолог мамандармен сұхбат