Алматы облысында қатты жел әуе шарында отырған адамды ұшырып әкетті
Оқыс оқиғадан қаза болғандар мен зардап шеккендер болған жоқ
Алматы облысында қатты жел әуе шарында отырған адамды ұшырып әкетті, деп хабарлайды Azattyq Rýhy.
Алматы облысы ТЖД баспасөз қызметінің мәліметінше, 1 қаңтар күні сағат 16:43-те Алматы облысы ТЖД пультіне Талғар ауданы «Ақ бұлақ» тау-шаңғы кешенінде қатты жел соғып, сақтандыру арқандарының үзілуі салдарынан әуе шарында отырған адамды тау жаққа ұшырып әкеткені туралы хабарлама түскен.
Шақырту орнына Талғар қалалық 2-МӨСБ-нен (7 қызметкер, 2 бірлік техника) және республикалық жедел-құтқару жасағынан (7 қызметкер, 1 бірлік техника, 1 кинологиялық есеп) ҚР ТЖМ бөлімшелерінің күштері мен құралдары жұмылдырылған.
«Жел ұшырып әкеткен шар ішінде әуе шарымен ұшу жөніндегі нұсқаушы отырған. Ол нұсқаулық талабына сай тиісті әрекет ете білуінің арқасында аман-есен төбеге қона алған. Талғар қаласының мамандандырылған өрт сөндіру бөлімінің қызметкерлері «Солдатсай» шатқалынан нұсқаушыны тауып, оны қауіпсіз жерге жеткізді», - делінген хабарламада.
Айта кетсек, оқыс оқиғадан қаза болғандар мен зардап шеккендер болған жоқ.
Алматы облысының ТЖД азаматтардан барлық қауіпсіздік ережелерін сақтауды сұрайды.
