Нұр-Cұлтанда үстіне металл конструкция құлаған әйел қайтыс болды

Azattyq Rýhy

Ол осы уақытқа дейін аурухананың жансақтау бөлімінде жатқан

Фото ашық дереккөзден

Нұр-Cұлтан қаласында үстіне металл конструкция құлаған әйел аурухана төсегінде қайтыс болды. Бұл туралы елорданың қоғамдық денсаулық сақтау басқармасының баспасөз қызметі хабарлады.

«Төбесіне металл конструкция құлаған елорда тұрғыны қайтыс болды. Қайғылы оқиға 22 қазанда болған еді. Төтенше жағдайдан зардап шеккен 1965 жылы туған әйел №2 қалалық көпбейінді ауруханаға өте ауыр жағдайда түсті. Пациентке ми операциясы жасалды, өкінішке қарай, оң динамика бермеді. Сондай-ақ, реанимациялық шараларға қарамастан, науқасты құтқару мүмкін болмады», - делінген басқарманың хабарламасында.

Естеріңізге сала кетейік, 22 қазан күні елордадағы көпқабатты үй шатырынан металл конструкция құлап, оқыс оқиға салдарынан 56 жастағы әйел зардап шеккен. Ол түрлі жарақат алып, жансақтау бөліміне түсті.

Сондай-ақ, қалалық полиция департаменті болған оқиғаға қатысты ҚР Қылмыстық кодексінің 306-бабына сәйкес сотқа дейінгі тергеу амалдарының басталғанын хабарлады.

×
Бұл желілік ресурстың ақпараттық өнімдері 18 жастан асқан адамдарға арналған.