Астанада металл конструкциясы үстіне құлап, зардап шеккен адам 10 күн бойы реанимацияда жатыр

Нұр-Сұлтанда металл конструкциясы үстіне құлап, зардап шеккен адам 10 күн бойы реанимацияда жатыр, деп хабарлайды Azattyq Rýhy.

Қалалық қоғамдық денсаулық сақтау басқармасының хабарлауынша, науқастың жағдайы ауыр.

«Дәрігерлер ешқандай болжам жасай алмай отыр. Әйел адам ауруханаға өте ауыр жағдайда бас жарақатымен түсті. Бірден медициналық көмек көрсетіліп, шұғыл ота жасалды», - деп хабарлады басқарманың баспасөз қызметі.

Осыған дейін зардап шеккен әйелдің жағдайы өте ауыр екені хабарланған болатын.

Айта кетейік, 22 қазан күні Сығанақ көшесіндегі «Номад» тұрғын үй ғимаратының сауда үйінің кіреберісінде әйел адамға металл конструкциясы құлап кеткен болатын. Әлеуметтік желілерде оқиға орнында түсірілген видео жарияланды.

Полиция қылмыстық кодекстің 306-бабы «Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтер көрсету» бойынша сотқа дейінгі тергеуді бастады, қажетті сараптамалар тағайындалды.