Павлодарда із-түссіз жоғалған әйелді өлтірді деген күдікті қолға түсті

Павлодар облысында із-түссіз жоғалған әйелді өлтірді деген күдікті қолға түсті, деп хабарлайды Polisia.kz.

«Хабар-ошарсыз кеткен 41 жастағы әйелдің дерегі бойынша жедел-іздестіру іс-шараларын жүргізу нәтижесінде 21 қазанда сағат 19.30-да Павлодар ауданы Мичурино ауылының шетіндегі орман жолағында зорлық-зомбылық белгілері бар әйелдің мәйіті табылды. Аталған факті бойынша ҚР ҚК 99-бабы 1-бөлігі бойынша сотқа дейінгі тергеу басталды. Қажетті сараптамалар тағайындалып, тергеу шаралары жүргізілуде», – деді Павлодар облысы Полиция департаментінің бастығы Нұрлан Мәсімов.

Полиция аталған қылмысты жасады деген күдікпен Шарбақты ауданының 32 жастағы тұрғыны анықталып, ұсталғанын атап өтті. Ер адам УҰИ-ға қамалды. Бұл қылмыстың мән-жайы мен себептері анықталуда.