Павлодарда екі көлік қақтығысып, 87 жастағы әйел көз жұмды

Оқыс оқиға салдарынан түрлі жарақат алған тағы екі адам ауруханаға жеткізілді, деп хабарлайды Pavlodarnews.kz.

Қайғылы оқиға Аймауытов көшесі мен Камзин көшесінің қиылысында болған. «Волга» және «ГАЗель» автокөлігінің қақтығысы салдарынан 1934 жылы туған әйел көз жұмды. Ал 1958 және 1994 жылғы ер адамдар түрлі дене жарақатымен Павлодар қаласындағы бірінші ауруханаға жеткізілді.

«Оқиға болған жерге "жедел жәрдем" қызметі шақырту түскеннен кейін 4 минут ішінде барды. Мамандар 87 жастағы әйелдің сол жерде көз жұмғанын растады. Ал екі ер адам түрлі дене жарақатымен ауруханаға жеткізілді», - деді облыстық жедел жәрдем станциясы.

Облыстық денсаулық сақтау басқармасының мәліметінше, 63 және 27 жастағы екі павлодарлық зардап шеккен. Оларға жабық ми жарақаты, мидың шайқалуы, кеуде тұсының аурырсынуы бойынша диагноз қойылды.