Павлодарда үш бала мен анасының жұмбақ өліміне қатысты қылмыстық іс тоқтатылды

Бұл қылмысты жас балалардың анасының өзі жасағаны анықталды

Павлодарда үш бала мен анасының жұмбақ өліміне қатысты қылмыстық іс тоқтатылды
фото: pavlodarnews.kz

Еске сала кетейік, былтыр қарашада Павлодарда пәтерден үш бала мен анасының денесі табылды. 9 қараша күні сағат 12:00-де полицияға ер адамнан Айманов көшесі, 2 мекенжайы бойынша орналасқан үйдегі пәтерден төрт адамның денесі табылғаны туралы хабарлама түскен.

Оқиға орнына келген жедел-тергеу тобы пәтер иесі үйге оралғаннан кейін есікті аша алмағанын анықтады, өйткені есік ішкі жағынан жабылған. Көршілерден құралды алып, есікті ашқан.

Пәтерге кірген кезде бөлмелердің бірінен зорлық-зомбылық белгілері бар жұбайының және үш баланың (2013, 2015 және 2017 жылдары туған) денесін көрген.

Ерлі-зайыптылар бірге тұрған, балалары ортақ некеден туған. Пәтерде тәртіп бұзылмаған. Полицияны жолдасы шақырған.

Pavlodarnews.kz порталының хабарлауынша, бұл іс Қылмыстық іс жүргізу кодексінің 35-бабының 1-бөлігі 11-тармағының негізінде тоқтатылды.

«ҚР Қылмыстық кодексінің 99-бабы 3-бөлігі бойынша сотқа дейінгі тергеп-тексеру жүргізілді. Іс бойынша жиналған дәлелдемелерді ескере отырып, бұл қылмысты жас балалардың анасының өзі жасағаны анықталды», - деп хабарлады облыстық полиция департаментінде.

×
Бұл желілік ресурстың ақпараттық өнімдері 18 жастан асқан адамдарға арналған.