ШұғылҚазақстанда бір тәулікте 1,5 мыңға жуық адам коронавирус жұқтырды

Шұғыл түрде колониядан ауруханаға жеткізілген Ислам Әбішевтің қазіргі жағдайы айтылды

Экс-шенеунік елордадағы қауіпсіздігі барынша төмен мекемеде жазасын өтеп жатыр

Ислам Әбішев, фото: primeminister.kz

Адвокат Абзал Құспан 31 мамыр кешкісін колонияда жазасын өтеп жатқан экс-шенеунік Ислам Әбішевтің ауыр жағдайда ауруханаға жеткізілгенін хабарлады. Оның айтуынша, экс-шенеунік Нұр-Сұлтан қалалық фтизиопульмонология орталығына жатқызылған.

Осы жағдайға қатысты Нұр-Сұлтан қаласы Қылмыстық-атқару жүйесі департаментінің баспасөз қызметі Azattyq Rýhy тілшісі жолдаған сауалға ресми жауап беріп, Ислам Әбішевтің қазіргі жағдайына қатысты айтты.

«Сотталған И.Әбішев Нұр-Сұлтан қаласындағы қылмыстық-атқару жүйесінің қауіпсіздігі барынша төмен мекемесінде жазасын өтейді. 31 мамырда денсаулық жағдайына байланысты мекеменің кезекші бөліміне хабарласқан. Колонияның кезекші қызметкерлері тез арада жедел жәрдем шақырып, дәрігерлер сотталғанды қалалық ауруханаға жатқызды. Қазір жағдайы бір қалыпты, тағайындалған емді алып жатыр», - делінген жауапта.

Сондай-ақ қалалық ҚАЖ департаментінің жауабында, Ислам Әбішевтен коронавирус инфекциясы анықталмағаны айтылған.  

Еске салайық, Ислам Әбішев 2014-2019 жылдар аралығында АШМ Су ресурстары комитетінің төрағасы қызметін атқарған. 2019 жылы 16 наурызда экс-шенеунік Қазақ күресі федерациясының вице-президенті Серік Түкиевпен бірге 60 миллион теңгеден астам ақшаны бопсалау жолымен пара алды деп күдікке ілінген. 2020 жылы 18 ақпанда Әбішев 5 жылға, Түкиев 4 жылға бас бостандығынан айырылды.