ШұғылҚазақстанда бір тәулікте 1430 адамнан коронавирус анықталды

Алматы облысында ондаған көлік қарлы боран астында қалды

Ауа райының нашарлауына байланысты өңірдегі көптеген автожолда қиындықтар туындауда

 

Алматы облысының тас жолдарында ондаған көлік қарлы боран астында қалды, полицейлер жүргізушілер мен жолаушыларды құтқаруды өз қолдарына алды, деп хабарлайды Polisia.kz

Райымбек аудандық полиция бөлімінің қызметкерлері аудан тұрғындары мен қонақтарына қар құрсауынан шығуға көмектесуде. Ауа райының нашарлауына байланысты облыстың көптеген автожолында осындай қиындықтар туындауда.

«Райымбек ауданының ПБ ЖПҚБ учаскелік полиция инспекторлары, атап айтқанда Кенже Болатхан мен Мажен Әліби боран салдарынан жолда қалып қойған адамдарға көмектесу үшін аудан автожолдарын патрульдеуде. Олар сондай-ақ асфальтты қардан үзіліссіз тазартатын қар жинайтын машиналарды қиын учаскелерге тартуда», – дейді Райымбек ауданының ПБ бастығы Мұрат Нұрдәулетов.

Желіде жарияланған видеода полиция қызметкерлерінің қызметтік көлікпен тұрып қалған машиналарды буксирмен шығарып жатқанын көруге болады.

Естеріңізге сала кетейік, республикалық және облыстық маңызы бар көптеген жолдар қатты жел мен қалың тұманға байланысты жабылды. Ал полицейлер өз кезегінде бұл орындарда тәулік бойы кезекшілік атқаруда.

«Қатты боранға қарамастан, тұрғындар мұқтаждықтарына байланысты жол жүріп, ұзақ сапарларға шығады. Сапар барысында сіздерден бұл туралы таныстарыңызға және туыстарыңызға хабарлауларыңызды сұраймыз. Қосалқы жылы киімдерді, сіріңкелерді және алғашқы медициналық көмек көрсету үшін дәрі-дәрмек қобдишасын өзіңізбен бірге алыңыз. Есіңізде болсын, қатал ауа райы сізге қатал мінез танытуы мүмкін!» – деп толықтырды ол.