Нұр-Сұлтанда карантин талаптарын бұзғандарға 122 миллион теңгеден аса айыппұл салынған

Карантин режимі басталғалы бері Нұр-Сұлтан қаласында салынған айыппұл көлемінің жалпы сомасы 122 526 468 теңгені құраған. Бұл туралы Нұр-Сұлтан қаласының Бас санитар дәрігері Жанна Қыдырбайқызы журналистерге арналған брифингте мәлім етті.

«Департаменттің аудандық басқармалары шектеу және карантин шараларын енгізу кезеңінде 550 айыппұл (жалпы сомасы 122 526 468 теңге) салды. Оның ішінде 246 жеке тұлғаға қатысты 11 892 618 тг сомаға, 304 кәсіпкерлік субъектіге 110 633 850 тг сома көлемінде айыппұл салынды. Кәсіпкерлік субъектілер арасында карантин режимін бірнеше рет бұзғандар бар. Мәселен, Тұран даңғылы, 2 үй (Есіл ауданы) мекенжайында орналасқан жазғы кафесі бар «AURA club ALANYA» түнгі клубы шектеу және карантин шараларын бұзғаны үшін сегіз рет әкімшілік жауапкершілікке тартылды. Атап айтқанда, белгіленген жұмыс режимі мен маска режимі, әлеуметтік қашықтық сақталмайды (келушілер 30-50 адамнан асады), сондай-ақ шектеуге қарамастан, түнгі клуб пен караоке жұмыс істеген», - дейді қалалық Бас санитар дәрігер.

Есепті кезеңде фармацевтикалық компаниялардың қызметіне жүргізілген мониторинг нәтижесі бойынша 102 субъектінің тіркелмеген дәрілік препаратты сату және дәрі-дәрмектерді шекі бағадан қымбатқа сату фактілері анықталып, жалпы сомасы 13 864 998 теңге әкімшілік жауапкершілікке тартылған.  

Еске сала кетейік, 27 қыркүйекте карантин талаптарын бірнеше рет бұзған «Алания» түнгі клубының әкімшісі қамауға алынды.

Айжан Қалиева, Нұр-Сұлтан