Алматыда көше ортасында автокөлік фарын жуумен айналысқан 24 жасөспірім жауапқа тартылды
Олар мұндай әрекетке ақша табу үшін барған
Алматы қаласының ювеналды полициясының қызметкерлері қала көшелерінде автокөлік фарларын сүртіп, жуумен айналысатын кәмелетке толмаған 24 жасөспірімді анықтады.
«Тамыз айының басынан бастап осыған ұқсас 24 факт анықталды. Екі жағдайда, кәмелетке толмағандардың жасы 16-да болып шықты. Демек, олар құқықбұзушылықтың субъектісі болып табылады және істеген әрекеті үшін толық жауап бере алады. Оларға қатысты ҚР әкiмшiлiк құқықбұзушылық туралы кодексінің 449-бабы бойынша әкімшілік хаттамалар толтырылды. Жасы кіші балалармен және олардың ата-анасымен алдағы уақытта мұндай әрекетке бармау туралы әңгіме болды. Ал, ересектерге құқық бұзған жағдайда, олардың ата-анасы міндетін тиісінше орындамағаны үшін ҚР әкiмшiлiк құқықбұзушылық туралы кодексінің 127-бабы бойынша әкімшілік жауапқа тартылатыны ескертілді», - деді Алматы қаласы ПД жергілікті полиция қызметінің бастығы Манап Саттаров.
Сондай-ақ полиция өкілдері ата-аналар арасында сауалнама жүргізгенде, олардың дені балаларының немен айналысатынын білмейтінін айтқан. Көпшілігінің айтуынша, аулаға ойнауға кеткен балалар ақша табу үшін жасырын көшеге шығады.
