Елордада ит зорлағандарға қатысты тергеу басталады - «Астана Ветсервис»

Қатыгездікпен жәбірленген иесіз иттерге қатысты тексеру жүргізіліп жатыр, деп хабарлайды «Астана Ветсервис» ШЖҚ КМК.

«Изолятор аумағында (Ақсүмбе тұйық көшесі, 1) қатыгездікпен жәбірленген иесіз иттерге қатысты тексеру жүргізіліп жатыр. Сараптама өткізіледі. Айта кету керек, изолятор аумағында кәсіпорын қызметкерлерімен бірге иесіз жануарларды күтуге көмектесіп жатқан тұрғындар жұмыс істейді. Арыз жазылып, Полиция департаментіне жіберілді. Кінәлі адамдар жауапқа тартылады», - делінген «Астана Ветсервис» ШЖҚ КМК таратқан хабарламада.

Еске салайық, «Стоп отлов» еріктілер қозғалысының Instagram парақшасында астанада ауланған иттерді ұстайтын орталықта 4 иттің зорлыққа ұшырағаны жайлы жазба жарияланды.  

«2020 жылғы 6 қыркүйекте біздің қордың еріктілері Ақсүмбе, 1 көшесіндегі иттер мен мысықтарды оқшаулау базасынан жыныстық мүшелері жыртылып, зорланған 4 итті тапты. Біреуі, қатты зардап шеккен, біз дереу клиникаға бардық. 7 қыркүйекте тағы 3 итті емханаға апарып, полицияға бардық», - делінген онда.

Қор өкілдерінің сөзінше, медициналық қорытынды төрт итке қатысты жыныстық зорлық-зомбылық фактісін растаған. Содан соң, олар бұл жағдайды  «Астана Ветсервис» ШЖҚ басшылығына жеткізген. Еріктілер қозғалысы бұл жауыздыққа жол бергендерді түгел анықтап жазалауды талап етеді.

«Полицияның бізге қалай қарағанын, арызды қалай қабылдағылары келмегенін көрулеріңіз керек еді! Бұл түнде болады, өйткені күндіз орталықта әрдайым еріктілер болады! Біз кінәлілерді тауып, жазалауды талап етеміз! Бізге көмектесіңіздер, қолдаңыздар! Бұл туралы барлығы білуі керек! Әйтпесе, олар бізді басып тастайды, кінәлілерді іздемейді және зорлық-зомбылық жалғаса береді!», - деп ашынды еріктілер қозғалысының өкілдері.