Ресей мен Украина азаматтары қазақстандықтардың 106 млрд теңгесін сыпырып алып, қашып кеткен (ВИДЕО)

Ресей азаматы Дмитрий Пунин мен Украина азаматшасы Марина Ильина қазақстандықтарға арналған заңсыз Pinco және Pin-Up онлайн казиноларды ұйымдастырған. Қаржылық мониторинг агенттігі олардың суретін шығарып, іздеу жариялады, деп хабарлайды Azattyq Rýhy.

Ресейлік ер адам 1985 жылы 8 ақпанда туған, украиналық әйел 1989 жылы 11 ақпанда дүниеге келген.

«Олар схеманы іске асыру үшін бақылаудағы компаниялардан, төлем ұйымдарынан және банк құралдарынан тұратын тармақталған халықаралық инфрақұрылым құрған. «Бонами» ЖШС PIN-UP.KZ брендімен букмекерлік қызмет көрсетуге лицензия алған. Компания брендті интернет-казиноның жұмысын бүркемелеу үшін пайдаланған. Ақша аударымдарын жүзеге асыру үшін бірнеше төлем ұйымын сатып алған. Сондай-ақ ұйымдардың жұмысын басқаратын адамдардың орнына құжат жүзінде ғана басшы болып тіркелген тұлғалар пайдаланылған. Қаржы секторы өкілдерінің көмегімен банк терминалдары желісі де іске қосылған», - делінген тергеу дерегінде.

Осылайша олар түрлі банк пен қаржы ұйымдарында ашылған 24 төлем терминалынан тұратын желі құрған. Оның 14-інен ақша шығарып отырған. 106 млрд теңге қаржы операциясын жасаған.