Қапшағайда жеңіл автокөлік мұз астына түсіп кетті

Қапшағай су қоймасында екі әйел отырған жеңіл автокөлік мұз астына түсіп кетті. Оқиға орнына жедел түрде құтқару қызметі жұмылдырылып, зардап шеккендерге медициналық көмек көрсетілді, деп хабарлайды Azattyq Rýhy. 

Оқиға қалай болды?

Төтенше жағдайлар министрлігінің мәліметінше, оқиға Қапшағай су қоймасының аумағында тіркелген. Белгісіз себептермен жеңіл автокөлік мұзды жарып өтіп, суға батып кеткен. Көліктің ішінде екі әйел болған.

Хабар түскен бойда оқиға орнына ТЖМ-нің жедел-құтқару жасағының күштері мен құралдары жіберілген. Барынша сақтандыруды қамтамасыз етіп, мұз үстінде жұмыс істеу үшін арнайы жабдықтарды қолданған. Мамандар екі адамды көліктің ішінен жедел шығарып, жағалауға жеткізген.

Зардап шеккендерге медициналық көмек оқиға орнында көрсетілді. Мәлімет бойынша, олардың өміріне қауіп төніп тұрған жоқ. Қосымша ақпарат нақтыланып жатыр.

Төтенше жағдайлар министрлігі азаматтарды мұз үстінде автокөлікпен жүруден бас тартуға және қауіпсіздік ережелерін қатаң сақтауға шақырды.