Экономиканың сапалы өсімі бағытындағы жұмысты жалғастыру керек – Үкімет басшысы

Үкімет отырысында Премьер-министр Әлихан Смайылов биылғы экономикалық көрсеткіштер жайлы айтты, деп хабарлайды Azattyq Ruhy.

«11 айдың қорытындысы бойынша жалпы ішкі өнімнің өсімі – 4,9%-ті құрады. Экономиканың барлық секторлары оң өсу динамикасын көрсетіп отыр. Машина жасау саласы шамамен 27%-ке өсті. Жеңіл өнеркәсіпте – 12%-ке жуық жоғары өсім тіркелді. Бұл көрсеткіш тоқыма бұйымдарын шығаруды – 20%-ке есебінен қамтамасыз етілді. Минералды өнімдер өндірісі – 4%-тен астам өсті. Пластмасса бұйымдарын өндіруде – 5%-ке,  тамақ өнімдерін шығаруда – 2%-ке жуық өсім қалыптасты. Тау-кен өнеркәсібі мұнай мен табиғи газды өндіру есебінен 5%-тен астам өсті. Құрылыс секторында – 12%    жоғары өсу қарқыны қамтамасыз етілді. 15 млн шаршы метрден астам тұрғын үй пайдалануға берілді», - деді Әлихан Смайылов.

Үкімет басшысы айтқандай, қызмет көрсету секторы бойынша сауда саласында – 11%-тен,     байланыс пен көлікте – 7%-тен астам өсім тіркелді.

«Экономикалық өсудің маңызды факторы – ішкі және сыртқы инвестициялар тарту. Тау-кен өндірісін есепке алмағанда, негізгі капиталға салынған инвестициялардың өсуі – 20%-тен жоғары болды. Бұл ретте инвестициялар тарту бойынша өндіруші емес салаларда белсенділік байқалып отырғанын атап өткен жөн. Инвестициялар өсімінің көрсеткіштері көлік және қоймалау (58,1%-ке), ауыл шаруашылығы (11,3%-ке), өнеркәсіп (8,5%-ке) саласында жоғары. Барлық негізгі көрсеткіштер бойынша Қызылорда, Жетісу және Абай облыстарында, сондай-ақ Алматы және Шымкент қалаларында оң серпін байқалады. Осы қарқынды сақтау үшін экономиканы одан әрі әртараптандыру,  инвестициялар тарту және тұрақты жұмыс орындарын құру шараларын    жалғастыру қажет», - деді ол.

Смайылов атағандай, ол үшін барлық орталық және жергілікті мемлекеттік органдар мына мәселелерге назар аударуы керек.

«Инвестицияларды белсенді тарту –экономика өсімінің негізгі факторы. Өңдеу өнеркәсібінің    шикізатты емес секторында, ең алдымен, ауыл шаруашылығы, көлік, логистика, IT мен туризм салаларында инвестициялық жобаларды іске асыруға баса назар аудару қажет. Жалпы, инвестициялық саясат шетелдік және ішкі инвестициялар сапасын арттыруға, инвесторларға арналған инфрақұрылымды жақсартуға бағытталуы тиіс. Бұл жұмыс отандық қор нарығы есебінен де    жүргізілуі керек. Мемлекет басшысы экономикаға инвестициялар тарту жөніндегі жұмыстың    тиімділігін арттыру үшін Инвестициялық штабқа ерекше өкілеттіктер беру туралы Жарлыққа қол қойғанын атап өткім келеді. Бұған қоса, мемлекеттік органдардың, сондай-ақ квазимемлекеттік сектор субъектілері басшыларының жүргізіліп жатқан жұмыстың нәтижелері үшін жауапкершілігі артты. Мемлекеттік қолдау шаралары жүйесін бәсекеге қабілетті, экспортқа бағдарланған және жоғары технологиялық компанияларға қарай қайта бағдарлау керек», - деді Смайылов.

Оның айтуынша, таза парақтан реттеу» қағидатын толық енгізу және мемлекеттік бақылау мен    қадағалау саласындағы Тәуекелдерді басқару жүйесін нақты іске қосу бизнесті дамытуға қосымша серпін беруі тиіс.

«Қарашада инфляция 10,3%-ке дейін төмендеді. Мемлекеттік органдар Инфляция деңгейін бақылау    және төмендету жөніндегі шаралар кешенін сапалы орындауды қамтамасыз етуі тиіс. Жыл соңына дейін 2 апта қалды. Экономика өсімінің оң серпінін сақтау, бөлінген қаражатты толық игеру және барлық нысаналы көрсеткіштерге қол жеткізуді қамтамасыз ету үшін бар күш-жігерімізді салуымыз қажет. Келесі жылы экономиканың сапалы өсуін қамтамасыз ету жұмысын жалғастыру керек. Тұрақты экономикалық өсуді кемінде 6% деңгейінде қамтамасыз ету – Үкіметтің орта мерзімді кезеңге арналған басты міндеті. Әрине, біз биік мақсат қойып отырмыз және ол бәрімізден    нәтижелі жұмыс пен  бірлескен күш-жігерді талап етеді. Бұл мақсатқа жету үшін бізде қажетті мүмкіндіктер бар», - деді ол.

Авторы: Аягөз ҚҰРМАШ