Аудиторлық тексеріс кезінде 231 млрд теңге сомасына бұзушылық анықталды - Қаржы министрі

Осы жылдың 11 айында камералдық бақылаумен 12 трлн теңгеге 507 мыңнан аса мемлекеттік сатып алу рәсімдері қамтылды. Бұл туралы Үкімет отырысында ҚР Премьер-Министрінің орынбасары – Қаржы министрі Ерұлан Жамаубаев мәлімдеді, деп хабарлайды Azattyq Ruhy.

«Тексеру қорытындылары бойынша 72 108 рәсім бойынша бұзушылықтар анықталды, оның ішінде мемлекеттік аудит объектілері кемшіліктерді жою туралы хабарламалардың 93%-ін орындады. Сонымен қатар 2 055 аудиторлық іс-шара өткізілді. Аудитпен 1,4 трлн теңге бюджет қаражаты қамтылды. Шамамен 231 млрд теңге сомасына қаржылық бұзушылықтар анықталды», ˗ деді министр. 

Оның айтуынша, тауарларды жеткізу, қызметтерді көрсету мен жұмыстарды орындау, бюджетке өтеу және есепке алу бойынша көрсету жолымен 175 млрд теңгеге бұзушылықтар жойылды.

Авторы: Еркежан АЙТҚАЗЫ