Тәуелсіздікке 30 жыл: биыл кімдерге рақымшылық жасалатыны айтылды

Педофил, жемқор, экстремистерге рақымшылық жасалмайды

Фото: ашық дереккөзден

Мәжіліс депутаттары «ҚР Тәуелсіздігінің отыз жылдығына байланысты рақымшылық жасау туралы» заң жобасын қарауға кірісті. Бұл туралы ІІМ Қылмыстық-атқару жүйесі комитетінің баспасөз қызметінен хабарланды.

Қарастырылып отырған құжатта алғаш рет әлеуметтік жағынан осал адамдар ұғымы енгізілді. Заң жобасының 2-бабына сәйкес оларға Ұлы Отан соғысының қатысушылары мен мүгедектері, Қарулы Күштер, басқа да әскерлер мен әскери құралымдар, оның ішінде бұрынғы КСРО әскери қызметшілерінің жесірлері жатады. Бұл санатқа қылмыстық құқық бұзушылық жасалған кезде он сегіз жасқа толмаған адамдар, елу жасқа толған және одан үлкен әйелдер, сондай-ақ алпыс жастан асқан ерлер де кіреді. Бірінші және екінші топтағы мүгедектерді, жүкті әйелдерді, сотталған, ата-ана құқықтарынан айырылмаған және осы заң қолданысқа енгізілген күні кәмелетке толмаған балалардың жалғыз ата-анасы деп танылған және ата-ана құқықтарынан айырылмаған әйелдерді де назардан тыс қалдырмады.

Заң жобасында қылмыстық теріс қылық жасаған және залал келтіруге әкеп соқпаған, не оны толық өтеген азаматтар мен мемлекеттің қауіпсіздігіне қатер төндірмейтін онша ауыр емес, сондай-ақ ауырлығы орташа қылмыстар жасаған сотталғандарды жазадан босату ұсынылады. Сондай-ақ, заң жобасында қарастырылған адамдар үшін негізгі жазаның мерзімі мен мөлшері қысқартылады.

Аталған топтағы адамдар тобын қарау кезінде қалған залалды толық өтеуі, сондай-ақ осы заң қолданысқа енгізілген күні жазасын өтеуге бір жылдан аспайтын уақыт теріс мінез-құлық дәрежесінің болмауы ескеріледі.

Өз кезегінде, заң жобасы жергілікті атқарушы органдардың еңбекке қабілетті адамдарды жұмысқа орналастыруын қамтамасыз етуде, сондай-ақ бас бостандығынан айыру орындарынан босап шыққандарға әлеуметтік және өзге де көмек көрсетуде шаралар қабылдауын көздейді.

ҚР Тәуелсіздігінің отыз жылдығына рақымшылық жасау кәмелетке толмағандарға жыныстық тиіспеушілікке қарсы қылмыс жасағандарға, жемқорларға, адам өлтіргендер мен экстремистерге, қылмыстық топтардың бұрынғы қатысушыларына қатысты қолданылмайды.

30 жыл ішінде Қазақстанда 8 рақымшылық жасалған, соңғы төртеуі ҚР Тәуелсіздік күніне орайластырылған.

×
Бұл желілік ресурстың ақпараттық өнімдері 18 жастан асқан адамдарға арналған.